Ne son ket mui télenn er barh...

Er bed é bud un auèl fol,
Er goed e rid, e rid dirol ;
Ne sonket mui Télenn er Barh.

En dén d'en dén e huch : lah ! lah !
Selleu en ol e zo divarh :
Er Gas é voug er Garanté.

Kannen er Peah hag er Vuhé,
Kannen er Guir, er Garanté,
E oé hembkin kannen er Barh.

Kanenn er Gad, kanenn er Lah,
Kanenn er Geu, ou des siouah !
Ou des goleit Kan en Délen.

Erbad é d'oh son hou sonnen :
Guel e veet doh er spéren,
De hortoz dé devé er gad.

Ken ma sého un auel mad
Er goéd chuillet : dareu en tad,
Dareu er vam hag er pried.

Ur linsel veur ar Vreih lédet
E voug pep joé kentéh gannet ;
Dresti ne sau meit er Beden.
Télenn tauet : Peah d'en Anken.

Betag ma vo arré en Nerh
-Gelloud er Lon- Tréhet akerh
D'er garanté Mam an Auen.

LOEIZ HERRIEU